كيف اكون مجموعتي الأساسية من المكياج و أدوات المكياج المهمة
إذا كنتِ محتارة ما هي أهم منتجات و أدوات المكياج اللي لازم تكون عندك ، و إذا كنتِ تسألي كيف اكون مكياجي و كيف اكون مجموعتي الأساسية من المكياج ، ومن اين ابدأ وماذا اشتري و ماهي افضل شركات المكياج و ماهي افضل منتجات المكياج. فهذا الموضوع لك ويساعدك ويختصر لك ويعلمك كيف تكوني مكياجك و كيف تكوني مجموعتك الاساسية من المكياج ويساعدك في اختيار أهم منتجات المكياج وافضلها بحيث ما تضيعي اموالك على منتجات المكياج الغلط. وعموماً هو الموضوع يحتاج إنك تجربي اكثر من منتج من اكثر من شركة وبعدها تستقري على منتجات الشركة اللي تناسبك. وفي هذي التدوينة راح اذكر ايضاً الشركات اللي ناسبتني من كل منتج.
كيف اكون مكياجي ؟
فيه أشياء أساسية يعني ما تقدري تعملي مكياج كامل من دونها باذكرها لكم ، وفيه أشياء ثانوية تضيف على مكياجك وراح اذكر بعض منها.
المكياج الأساسي و أدوات المكياج الأساسية
ماسكارا الحواجب الشفافة
ماسكارا الحواجب أكثر من مهمة لترتيب وتثبيت حواجبك واعطاؤهم شكل مميز وثابت خاصة لصاحبات الحواجب الكثيفة. اللمسة الجمالية اللي تضيفها لك هذي الماسكرا جداً رائعة وتفرق كثير في مظهرك. انا ما استغني عنها ابداً في كل مشوار وطلعة. بالنسبة لي استخدم الماسكارا الشفافة من بنفت لأن ثباتها عالي. يوجد أنواع ملونة بدرجات مختلفة مثل البني الغامق والفاتح بس أنا افضل الشفافة.
طريقة استخدام ماسكرا الحواجب الشفافة إنك تمشطي حواجبك بالفرشاة وبعدها تستخدمي الماسكارا كالفرشاة حسب اتجاه نمو الحاجب مع الضغط بقوة أثناء السحب.
باليت ظلال العيون
باليت ظلال العيون من انستازيا رهيب وتقدري تستفيدي منه للسهرات والمكياج اليومي وثباته جداً ممتاز. وممكن تستخدميه في رسم الحواجب. يحتوي على درجات مات (مطفية) ودرجات القلتر ولذلك انا اعتبر هذا الباليت اثنين في واحد. الدرجات مثل الصورة الاسود والبني والبيج والعودي واللحمي والوردي والبنفسجي. وفيه باليتات أخرى من انستازيا تختلف درجاتها لكن انا عجبني هذا. واقترح عليك كمان تجربي ظلال العيون من مورفي لكن ثباتها مو بنفس قوة ثبات ظلال انستازيا.
احمر الشفاه
ممكن تكتفي بثلاثة ألوان ولا تحتاجي يكون عندك ألوان الدنيا كلها. لأنك بالنهاية سوف تستخدمي لون أو لونين منها. انا استخدم منتجات flormar وأسعارها مناسبه للجميع.
كونسيلر (درجتين مختلفة)
تحتاجي يكون عندك درجتين من الكونسيلر (غامقة ، فاتحة). واختيار درجة لون الكونسيلر الغامقة تعتمد على درجة لون هالاتك وبناءاً عليه تقرري الدرجة اللي تحتاجيها. والسبب أنه نحتاج نغطي الهالات بدرجة غامقة عشان ما تقلب رمادي وما يكون شكلك غريب وما كأنك سويتي شيء. إذا هالاتك غامقة جداً اشوف درجة Cramael مناسبة في هذي الحالة. اما اختيار درجة لون الكونسيلر الفاتحة يعتمد على لون بشرتك الحقيقي. مثلاً تختاري درجة Biscuit أو Ginger.
عموما هذي اغلب الدرجات في شركة نارس اللي تناسب بشرتنا العربية (Caramel ، Biscuit ، Ginger ، Custard). وتقدري تكتبي بقوقل وتشوفي الألوان حتى يساعدك تقرري ايش درجتك المناسبة.
ايلانير
ما اقدر اتخيل مجموعة مكياج بدون ايلانبر. إذا كنتي من عشاق الايلانير مثلي فأفضل نوع ايلانير للمبتدئين هو الايلانير الكريمي. اما النوع السائل إذا كانت ريشته رفيعة فهو يناسب المحترفات أكثر ، لكن فيه نوع من الايلانير السائل تكون ريشته سميكة وهذا ينفع للمبتدئين وسهل استخدامه.
انا استخدم ايلانير كريمي من ايليف Elf للاستخدام اليومي لأنه ينمسح بالماء بسهولة وحلو جداً للتدريب. اما للمناسبات استخدم ايلانير انجلوت لكنه يجف بسرعة وتحتاجي تشتري القطرة معه تحطيها إذا جف وبيرجع طبيعي.
ماسكارا
انا أفضل يكون عندي نوعين من الماسكارا ، نوع خفيف للاستخدام اليومي ويمكن إزالته بالماء. ونوع ثقيل للسهرات والمناسبات. النوع الخفيف استخدم ماسكارا من ايليف Elf. وللسهرات استخدم ماسكارا من ماك Mac.
باليت أحمر خدود (بلاشر)
انا ما اشوف احمر الخدود شيء اساسي حتى تكوني مجموعة المكياج الأساسية. لكن نقول أنه أفضل شيء أحمر الخدود على شكل باليت يكون فيه درجات متفاوتة من الوردي والمشمشي والعودي... الخ. فيه نوع باليت كريمي احبه أكثر من الباليت البودرة لأنه يندمج بسهولة ومنظره طبيعي لكن غير مناسب بالصيف لأنه ممكن يعطي منظر دهني خصوصاً للبشرات الدهنية. وإذا ميزانيتك ما تسمح لك مافي داعي تشتري أحمر خدود لانه شيء اضافي وعادي جداً إذا استخدمتي الارواج اللي عندك كأحمر خدود إلى أن يتحسن وضعك المادي.
البودرة الخفيفة loose setting powder
مهمة جداً في تكوين مكياجك الأساسي وتستخدم لتثبيت كريم الأساس والكونسيلر. انا جربت بودرة لورا مارسيه الشفافة وبودرة لا فيمي الصفراء ، وكلها كانت ممتازة. ويفضل يكون عندك فرشاة كبيرة لتوزيع البودرة. وفيه بعض الناس تستخدم الاسفنجة لتوزيعها.
البودرة المضغوطة
ما اشوفها ضرورية كثير للجميع في تكوين مكياجك الأساسي لكن بالنسبة لي ضرورية وأساسية لإني ما احب استخدم كريم أساس (Foundation). فيه كثير شركات وأسعارها وجودتها متفاوتة. وهي من أدوات المكياج اللي لازم يكون جودته ممتازة لأنها تؤثر على جودة مكياجك. اكثر بودرة عجبتني هي نوع Studio fix من شركة ماك ، وعندهم درجات الألوان كثيرة. ومهم إنك تنتبهي تشتري نوع افتح من لون بشرتك بكثير لأنه لونك رح يقلب رمادي وما رح يكون طبيعي.
كريم الأساس Foundation
اصعب شيء هو اختيار كريم الأساس. انا انسانه ما استخدم كريم اساس واتضايق منه إلا بالمناسبات الكبيرة طبعاً. ولكن اللي تحب تستخدمه انصحها تتابع مقاطع باليوتيوب لأنه اصعب شيء هو اختيار درجة كريم الأساس المناسبة ، وحتى لما تجربي العينات في المحلات ما تكون التجربة مضبوطة ١٠٠٪ بسبب اختلاف الإضاءة ولأن الأغلب يجربوا كريم الاساس في معصم اليد بالعادة وهو يختلف عن لون بشرة الوجه. ولكن رأيي الشخصي انه حاولي تختاري كريم اساس خفيف للاستخدام اليومي ويكون قريب من لون بشرتك ، وما تختاري لون افتح من بشرتك بكثير لأنه رح يقلب رمادي ورح يبين مظهرك مو طبيعي ويبين الفرق اضح بين لون الجسم والوجه.
مجموعة فرش للوجه
فرش الوجه من أهم أدوات المكياج الاساسية. كيف تضعي مكياجك بدونها؟ هي مهمة جداً في نظافة مكياجك وتحتاج تدريب خصوصاً عند استخدامها مع ظلال العين.
فيه ٣ أنواع عامة من فرش المكياج:
- الفرش اللي شعرها طبيعي وهذي يكون سعرها مرتفع وتحتاج عناية لكنها فرش فنانة.
- الفرش اللي شعراتها صناعية وتحاكي ملمس الشعر الطبيعي وتتفاوت جودتها حسب الشركة وفيه شركات رديئة الشعرات تتساقط وتتلف بسرعة.
- الفرش الصناعية اللي شعراتها ذات ملمس بلاستيكي وتستخدم للمنتجات الكريمية.
ضروري جداً يكون عندك مجموعة فرش وأفضل شيء تكون جودتها ممتازة إلى متوسطة حسب ميزانيتك. ويمكن تحتاجي فرشاة واحدة شعراتها بلاستيك لتطبيق الكونسيلر تحت الحاجب. انا استخدم فرشاة من شركة ايلف Elf وجداً ممتازة ودقيقة لهذا الغرض.
اسفنجة مكياج
الاسفنجة تعتبر من أدوات المكياج المهمة والأساسية . الاسفنجة مهمة لتوزيع الكونسيلر وتخفيف كريم الأساس في حال حطيتي كميات كبيرة ، فالاسفنجة تمتص الكمية الزائدة من كريم الاساس. وأنا احياناً استخدمها في توزيع البودرة. الاسفنجة لها أحجام وأشكال متنوعة. وضروري غسلها أو تغييرها من فترة لأخرى وتهويتها حتى تجف تماماً.
أدوات المكياج الثانوية (الإضافية)
الكونتور
ما اعتبر الكونتور اساسي من ضمن مجموعة المكياج الاساسية لأنه مو كل البنات تحتاجه. انا استخدم الكونتور البودر وعندي كونتور كريمي لكن دمجه صعب وما عرفت اتعامل معه. هذا الباليت من NYX فيه درجات متنوعة ومااستخدم منها غير درجتين فقط. ينفع يستخدم كظلال للعين أو تعملي فيه كونتور للعين.
بخاخ الوجه فكس بلس
بخاخ فكس بلس من المنتجات المهمة لكن ما وضعته ضمن مجموعة المكياج الاساسية لأنه تقدري تستغني عنه لكنه يعطي إضافة جميلة لمكياجك. فكس بلس له استخدامات كثيرة ويستخدم لتثبيت المكياج ايضاً لكن ما يثبته لفترات طويلة مثل بخاخ مثبت المكياج المخصص. ويمكن استخدامه قبل المكياج وبعده. ويعمل على ترطيب البشرة ويعطي اشراقة للوجه. وهو يساعد على دمج مكياجك ويصلح عيوبه. ولكن يعيبه انه ارتفاع سعره.
البرايمر
البرايمر تحتاجه البنت اللي بشرتها فيها ثقوب ومسامات وعيوب كثيرة ويستخدم قبل كريم الاساس لتهيئة البشرة لوضع المكياج. البرايمر يساعد على تضييق المسام الواسعة ويخفف من مظهر الندوب وتعبئة خطوط البشرة. البعض ما ينصح فيه لأنه ممكن يزيد مشاكل البشرة لكن ممكن يختلف من شركة لاخرى. بالنسبة لي ما استخدمه نهائياً. فيه برايمر من بنفت مدحوه كثير ممكن تقرءوا عنه.
الإضاءة
الإضاءة تعتبر من الاشياء الثانوية ضمن مجموعة المكياج. تستخدم الإضاءة لإنارة وابراز اجزاء من الوجه مثلا عند مدمع العين أو على عظمة الخد أو أرنبة الأنف والذقن. الإضاءة تضيف احترافية على مكياجك بس للي يعرف يستخدمها صح. فيه منتجات كريمية ومنتجات بودر. انصح تشوفوا فيديوهات باليوتيوب عنها. انا لما كنت افكر كيف اكون مجموعة مكياجي الاساسية كنت محتارة كثير إذا اشتري اضاءة او لا ، واشريتها وما استخدمتها ابداً.
قلم العيون (كحل)
قلم العيون يعتبر من الاشياء الاساسية ضمن مجموعة المكياج الاساسية عند بعض البنات. لكن بالنسبة لي يكفيني الايلاينر. لأن الايلاينر اقدر استخدمه باطلالات كثيرة ثقيلة وخفيفة هو الكل في الكل. استخدم قلم عيون لونه بيج لتكبير العين. واستخدم احياناً قلم عيون اسود من Channel وجودته ممتازة وسعره في حدود ١٠٠ ريال.
الرموش
إذا عندك مناسبة سهرة أو حفل زفاف نقدر نعتبر الرموش شيء اساسي من ضمن مجموعة مكياجك. الرموش انواعها واشكالها كثيرة. يختلف الشكل حسب شكل عيونك فالعين الدائرية لا تناسبها الرموش المخصصة للعين المبطنة وهكذا. ويوجد رموش شعراتها بلاستيكية ورموش شعراتها شبه طبيعية. لذلك لازم تعرفي النوع المناسب لك. انا شريت مجموعة رموش وللاسف كلها ما ناسبتني وصرت اقص منها حتى يضبط شكلها. بالإضافة إلى غراء الرموش وتحتاجي نوع جيدمن الغراء.
مثبت المكياج
مثبت المكياج يعتبر من الاشياء الاضافية على مجموعة مكياجك. انا مجموعة مكياجي ما فيها مثبت ولا افكر اشتريه حالياً. يساعد مثبت المكياج في تثبيت مكياجك لاطول فترة ممكنة.
وأخيراً اتمنى تكونوا استفدتوا إذا عندكم تجربة أو أي سؤال اكتبوهم بالتعليقات. واشتركوا بالمدونة بالضغط على زر الاشتراك عشان توصلكم التدوينات الجديدة.
ليست هناك تعليقات:
إرسال تعليق